Kultum. Sumbang Makan

Padang, 21 Juni 2017

Bismillahirrahmanirrahim

Assalamu’alaikum Wawahmatullahi wabarakatuh

Partamo dan nan utamo sakali sagalo puji sarato raso syukur marilah kito sampaikan ke hadirat Allah SWT nan alah mangurniai kito jo  iman, islam sarato kesehatan sahinggo kito masih dapkh baubudiayah sampai kini. Salanjuiknyo salawaik sararto salam kito mohonkan ka Hadirat Allah SWT mudah2an salalu tacurah kapado Baginda Rasulullah SAW.

Illahi anta maksudi waridhaka matlubi.

Angku angku,  niniak mamak, alim ulama cadiak pandai, bundo kanduang sarato rang mudo jo puti bangsu jamaah musajik Baitul Mu’minin nan ambo hormati. Bapak, Ibuk dan Sanak Saudaro pangurus musajik nan ambo muliakan.

Katiko Bapak  Pangurus mamintak ambo maisi kultum pada subuah kini ambo maraso tasanjuang bana, karano diagiah kesempatan manyampaian bahan diskusi kito basamo, iko juo menjadi sarana silaturahmi dek ambo sabagai warga baru. Ambo tingga di jln BCA No, 5 RT 01 RW  08  sasudah komplek Green Bariang. Suatu kahormatan dek kami bilo jamaah punyo waktu senggang datang karumah.

Ambo mintak maaf karano latar balakang ambo indak ustad, indak pulo niniak mamak. Disiko banyak hadir dikalangan dosen , guru, ulama sarato niniak mamak dan bundo kanduang,  mako ambo mohon di tukuak jo dibilai panyampaian ambo ko supayo batua.

Asyaimin wasyaimun Rahimukumullah,

Topik diskusi kito subuahko adolah satantangan Sumbang Duo Baleh.

Qalallahu ta’ala filquranil karim Surat Attahrim ayat 6:

يَا أَيُّهَا الَّذِينَ آمَنُوا قُوا أَنْفُسَكُمْ وَأَهْلِيكُمْ نَارًا وَقُودُهَا النَّاسُ وَالْحِجَارَةُ عَلَيْهَا مَلائِكَةٌ غِلاظٌ شِدَادٌ لا يَعْصُونَ اللَّهَ مَا أَمَرَهُمْ وَيَفْعَلُونَ مَا يُؤْمَرُونَ

Artinyo : Hai orang-orang yang beriman, peliharalah dirimu dan keluargamu dari api neraka yang bahan bakarnya adalah manusia dan batu; penjaganya malaikat-malaikat yang kasar, yang keras, yang tidak mendurhakai Allah terhadap apa yang diperintahkan-Nya kepada mereka dan selalu mengerjakan apa yang diperintahkan.

Nan kuriak kundi, nan merah sago, nan elok budi nan endah baso

Kalau kito calaik kurenah anak-anak, kamanakan, cucu kito kini ko iyo alah mangkhawatirkan bana, cobolah kito paratian raso pareso, sopan  santun sabagai urang minang nan mampunyo’i ABS - SBK sabagi falasafah adaiknyo alah banyak di tinggaan, sakurang-kurangnyo indak dilestarian karano indak tau atau indak mau tau. Atau labiahnyo  “bak bajak indak basingka”, kalua hal nan samacam iko bilo dipadiaan, suatu saat nantik adaik minang akan tingga di karate sajo.  Salah satu strategi Snouck Hougronye untuk munguasoi nigari ko dulu salah satu caronyo Nilai-nilai ABS SBK ko di pabusuakan urang Minang indak bangga, indak paduli indak manghargoi budayanyo. Pangaruah itu taraso sampai kini, pembusukan budaya ko taraso capek dengan adonyo globalisasi.

Kito patuik basyukur, kota Padang mulai tahun 2017 ko alah mulai malakuan pambinaan ka kalurahan kalurahan untuk maiplementasian nilai-nilao ABS SBK di kalurahannhyo masing-masing di bulan Agustus ko insya Allah akan dilombaan. Ado 45 butir sakurang-kurangnyo indikator nan akan dikarajoan dek masyakaik. Salah satunyo adolah mamfiralkan baliak tantang “Sumbang Duobaleh”.

Nan manjadi dasar Sumbang Duobaleh ko adolah Undang Undang Adat Minangkabau ( Undang Undang Nan Duo Puluah),  pado bahagian Undang - Undang Nan Salapan dikecek “SUMBANG - SALAH”  Sumbang adolah konsep untuak manyatokan parangai sasaurang dalam bagaua nan bapotensi manggiriang urang tu untuak babuek salah (tindakan preventif).

Sumbang adolah pabuatan nan indak sasuai jo nilai adat Minangkabau tacela agama Islam. Urang Minang manyabuiknyo” indak tau di nan ampek” atau “indak tahu jo adaik”. Jiko disimak lebih dalam,  nampak banyak nilai-nilai pendidikan karakter nan tadapek di dalamnya. Sumbang duo baleh tardiri dari: sumbang duduak, sumbang tagak, sumbang diam, sumbang bajalan, sumbang kato, sumbang caliak, sumbang bapakaian, sumbang bagaua, sumbang karajo, sumbang tanyo, sumbang jawab, sumbang kurenah.

Salah satu dari nan duo baleh tu, nan kito diskusian subuah kini ko adolah sumbang makan.

Salah satu hikmahnyo kito puaso ko, adolah saluruh anggota kaluaraga makan basamo sahamparan di lapiak atau di meja makan. iko adolah sabuah proses Pendidikan nan harus kito lestarian sampai di lua bulan Ramadhan ka anak-anak sahinggo jadi kapribadiannyo, kakrano apo nan inyo biasoan di rumah itu pulo nan dibaonyo sampai gadang.

Sumbang Makan ko adolah taratik atau adaik makan, manuruik adaik kito makan ko indak sakadar mamasuakan makanan kadalam muncuang, tapi adolah sabuah karajo nan ado adab aturannyo, dek karano makanan nan dimasuak kan ka dalam tubuah kito malalui muncuang tu adolah untuak maagiah tanago supayo tubuah lahia jo bathin sihaik batambah kuaik baibadah jo baamal shaleh.

Pai ka acara undangan makan atau makan baradaik di Minangkabau bukanlah pai makan malapehan salero, atau pai makan pabaikan gizi, tapi iolah pai makan mampacaliak an muko nan Janiah hati nan suci. Sabalun makan ado prosesi adaik nan harus dilalui talabiah dahulu sarupa basurah adaik sabalun makan, bisa mamakan wakatu nan agak lamo, makonyo urang tuo kito manyuruah makan dulu di rumah baru pai katampek acara tu, supayo kito indak manjadi malu beko.

Niniek moyang kito saisuak mambuek aturan untuak manjago makanan tu supayo dapek maagiah berkah ka kesehatan tubuah jo rohani kito. Mako nyo diagiah tahu tantangan Sumbang Makan akan mangarah kapado indak baradab jo bataratik makan, sumbang makan di Minangkabau sakurang ad 16 macam sumbang iolah:

1.         Makan sambia tagak, kunyah kenyoh sambia tagak

2.         Makan sambia bajalan

3.         Makan bacapak sampai tandanga dek urang sarupa makan bangso lupak jo samuik

4.         Mahota sambia makan sarupo bule dalam film

5.         Makan basiso; makonyo suoak nasi jo ujuang jari, suok nan usah gadang-gadang. Batambuah agak-agak, bia acok asakan sakatek

6.         Maambiak nasi sampai balanjuang di piriang sarupo urang rakuih

7.         Manjangkau makanan, ambiaklah makan nan tadakek ka kito, nan dakek kito tu insha Allah razaki kito 

8.         Makan talalu kanyang, sahinggo sulik banafas atau manggarik

9.         Mamacik galeh katiko minum jo tangan kida, sarancaknya pakai isyaraik aleh jo tangan kanan bilo tangan kanan dipakai untuak manyuok nasi

10.      Majamba makan atau minum jo tangan kida

11.      Makan talalu capek, kunyak kida, kanan dah lu langsuang gol.

12.      Manyilangan sendok jo garapu cando tando tambah (salib)

13.      Salasai makan sendok batilantangan, tando alun kanyang

14.      Sendok jo piriang babunyi apolagi baradu jo gigi.

15.      Mandahului mancuci tangan sabalun nan tuo mancuci tangan

16.      Mandahului makan sabalun di pasilahkan

Nilai-nilai karakter ko harus di baiasoan sajak dari rumah, disokalah jo di masyarakaik baru nyo jadi kepribadian. Ketek ta manjo manjo, gadang tabao-bao, alah gaek ta ubah tido.

Wassalam

Ratmil, S.Sos. M.Pd,